गैर आवासीय नेपालीद्वारा नेपाली नागरिक सरह नागरिकता दिन माग

एनआरएनए

गैर आवासीय नेपाली संघ (एनआरएन) ले आपूmहरुलाई पनि नेपाली नागरिक सरह नागरिकता पाउने कानुनी व्यवस्था गर्न सरकार र  संसदलाई आग्रह गरेको छ। 

एनआरएनका संस्थापक अध्यक्ष उपेन्द्र महतोले गैरआवासीय नेपालीलाई पनि नेपाली नागरिक सरह नागरिकता पाउने कानुनी व्यवस्था गर्न संघीय संसद र सरकार दुवैलाई आग्रह गरेका हुन्।

बिहीबार संघीय संसदको राज्य व्यवस्था तथा सुशासन समितिको बैठकमा ‘नेपाल नागरिकता ऐनलाई संशोधन गर्न बनेको बिधेयक’माथिको छलफलमा भाग लिँदै उनले राष्ट्र निर्माण गर्ने अभियानमा आफूहरुलाई पनि सहभागी गराउन गैर आवासीय नेपाली नागरिकलाई पनि नेपाली नागरिक सरह नागरिकता लिन पाउने व्यवस्था गर्न संघीय संसद र सरकारको ध्यानाकर्षण गराए।

विद्यमान कानुनमा गैर आवासीय नेपाली नागरिकलाई राजनीतिक अधिकार कटौति गरी नेपाली नागरिकताको प्रमाणपत्र वितरण गर्ने व्यवस्था गरिएको छ।  त्यसप्रति संसद र नेपाल सरकारप्रति आभार व्यक्त गर्दै संस्थापक अध्यक्ष महतोले राजनीतिक अधिकार पनि समावेश गर्न सरकारसँग माग गरे। उनले गैर आवासीय नेपाली राष्ट्र निर्माणको अभियानमा प्रतिवद्ध रहेको समितिलाई जानकारी गराए। 

एनआरएनका अध्यक्ष भवन भट्टले पनि गैर आवासीय नेपाली नेपाललाई समृद्ध बनाउन प्रतिवद्ध रहेकोे उल्लेख गर्दै त्यसमा शंका नगर्न समितिका सदस्यलाई आग्रह गरेका थिए। उनले नेपालको समृद्धिको अभियानमा गैर आवासीय नेपाली सहयोगको दायरा बढाउन अझै क्रियाशील भएर लागिपर्ने प्रतिवद्धता पनि व्यक्त गरे। 

बैठकमा प्रमुख प्रतिपक्ष दल नेपाली काँग्रेसका सांसद दिलेन्द्रप्रसाद बडूले गैर आवासीय नेपालीलाई सम्बन्धित देशकै नेपाली दूतावासबाट नागरिकता लिन पाउने व्यवस्था गर्न सरकारसँग माग गरे। उनले गैर आवासीय नेपालीको भावी पुस्ताले पनि नेपाली नागरिकता पाउने व्यवस्था गर्न सरकारले अप्ठयारो मान्न नहुने बताए। 

सत्तारुढ नेपाल कम्युनिष्ट पार्टी (नेकपा)का सांसद कृष्णभक्त पोखरेलले गैर आवासीय नेपालीहरुको ज्ञान, सीप र पूँजी राष्ट्र निर्माणका लगाउने गरी आवश्यक कानुनी प्रबन्ध गर्न सरकार प्रतिवद्ध रहेको बताए।

उनले बाध्य भएर कामको खोजीमा विभिन्न मुलुकमा बस्न पुगेका नेपाली नागरिकको मागलाई ध्यानमा राखेर आर्थिक, सामाजिक तथा सांस्कृतिक अधिकारसहितको नागरिकताको व्यवस्था गरिएको जनाए। विधेयकमा गैर आवासीय नेपालीहरुको आर्थिक, सामाजिक तथा सांस्कृतिक अधिकार हुने गरी नेपाली नागरिकताको प्रमाण पत्र वितरण गर्ने प्रस्ताव गरिएको छ। 

राजमार्ग समाचारदाता
fnnews@gmail.com

यो छुट्टाउनु भो कि..