अब काठमाडौं भित्रिने र बाहिरिनेमाथि हुँदैछ यस्तो थप कडाइ

वि.सं.२०७७ साल आषाढ १० गते, बुधबार, काठमाडौं । कोरोना भाइरस (कोभिड-१९) सङ्क्रमणको महामारीबाट काठमाडौं उपत्यकालाई सुरक्षित राख्न उपत्यका भित्रिने र बाहिरिनेमाथि थप कडाइ गरिएको छ ।

जिल्ला प्रशासन कार्यालय काठमाडौं, ललितपुर र भक्तपुरले घरधनीको मञ्जुरी तथा पालिकाको स्वीकृति नलिई भित्रिनेलाई नियन्त्रणमा लिएर क्वारेन्टाइन पठाउने तयारी गरिएको छ ।

त्यस्तै, बाहिर जानेका लागि पनि सम्बन्धित जिल्लाको पालिकाबाट सिफारिस पत्र अनिवार्य गरिएको छ । आफूखुसी भित्रिनेलाई विभिन्न पार्टी प्यालेसमा बनाइएका क्वारेन्टाइनमा बस्ने व्यवस्था गरिएको छ ।

काठमाडौंका प्रमुख जिल्ला अधिकारी जनकराज दाहालले असुरक्षित आवागमनका कारण कोरोना सङ्क्रमण बढ्ने भएकाले व्यवस्थित र सुरक्षित बनाउन उपत्यकामा आउने र बाहिर जानेमाथि थप कडा गरिएको बताए ।

निजी स्रोतबाट सञ्चालित विद्यालयका सञ्चालकले इन्टरनेटको पहुँच नभएका अभिभावकलाई अनलाइन कक्षामा बालबालिकाको सहभागिता बढाउन दबाब दिन थालेपछि काठमाडौं भित्रिनेको सङ्ख्या बढ्न थालेको हो ।

महानगरीय ट्राफिक प्रहरी महाशाखाका प्रमुख भीमप्रसाद ढकालका अनुसार विभिन्न नाकाबाट दैनिक १ हजार ८ सयभन्दा बढी सवारी साधन भित्रिने गरेका छन् । करिब १ हजार ६ सय बाहिरिने गरेका छन् । उनले भने, ‘पालिका तथा स्थानीय तहको सिफारिस नलिई आउनेलाई कारबाही हुन्छ ।’

यसैबीच, गृह मन्त्रालयले पनि बाहिरबाट काठमाडौं उपत्यका भित्रिनेका लागि कम्तीमा १४ दिन होम क्वारेन्टाइनमा बस्ने व्यवस्था मिलाउन निर्देशन दिएको छ ।

काठमाडौं, ललितपुर र भक्तपुर जिल्लाका प्रमुख जिल्ला अधिकारीलाई मङ्गलबार निर्देशन दिँदै स्वास्थ्य तथा जनसङ्ख्या मन्त्रालयबाट जारी कोभिड-१९ नियन्त्रण निर्देशिका अनुसार लक्षण देखा परेमा मात्र स्वास्थ्य परीक्षणका लागि अस्पताल जाने व्यवस्था गरिएको छ ।

घरधनीहरूले बाहिरबाट आएकालाई डेरा तथा भाडाको कोठामा प्रवेश गर्नुअघि पीसीआर परीक्षण गर्न बाध्य गरेकाले शुक्रराज ट्रपिकल तथा सरुवा रोग अस्पताल टेकुमा दैनिक १ हजारभन्दा बढी सर्वसाधारण पीसीआर परीक्षणका लागि जाने गरेको मन्त्रालयले जनाएको छ ।
गोरखापत्र दैनिकमा खबर छ।

Loading...
राजमार्ग समाचारदाता
fnnews@gmail.com

यो छुट्टाउनु भो कि..