भरतपुर महानगरपालिकाद्वरा धुर्मुस सुन्तली फाउण्डेशनलाई क्रिकेट रंगशाला बनाउन थप १ करोड ५० लाख निकासा

कातिक २, चितवन । भरतपुर महानगरपालिकाले गौतम बुद्ध अन्तर्राष्ट्रिय क्रिकेट रंगशाला निर्माणको लागि धुर्मुस सुन्तली फाउण्डेसनलाई आइतबार एक करोड ५० लाख रुपैयाँ निकासा गरेको छ ।

भरतपुर महानगरपालिका प्रमुख रेनु दाहालले फाउण्डेसनका अध्यक्ष सिताराम कट्टेल धुर्मुसलाई एक करोड ५० लाख रूपयाँको एकाउण्टपेयी चेक हस्तान्तरण गरेकी हुन् ।

भरतपुर महानगरपालिकाले आन्तरिक श्रोतबाट विनियोजित चार करोडमध्ये पहिलो चरणमा ५० लाख रुपैयाँ र अहिले दोस्रो चरणमा एक करोड ५० लाख रुपैयाँ प्रदान गरिएको महानगर प्रमुख दाहालले जानकारी दिइन् । उनले गौतम बुद्ध अन्तर्राष्ट्रिय क्रिकेट रंगशाला कोरोना कहरका बीचमा पनि तिव्र गतिमा अगाडि बढिरहेको बताउँदै निर्माण प्रगतिका आधारमा बिनियोजितमध्येको रकम थप्दै लगिने समेत बताएकी छन् ।

महानगरपालिका प्रमुख रेनु दाहालले फाउण्डेसनले सन्तोषजनक ढंगले रंगशाला निर्माणको काम अगाडि बढाइरहेकोमा फाउण्डेसनलाई धन्यवाद दिँदै अन्य रकम पनि आवश्यकता र कार्य प्रगतिका आधारमा निकासा गरिँदै जाने बताइन् । उनले रंगशाला निर्माण कार्यलाई तदारुकताका साथ अगाडि बढाउन आग्रह गर्दै संघ, प्रदेश र अन्य निकायहरूले गर्ने आर्थिक सहयोगका लागि पनि आफूले आवश्यक समन्वय र सहजीकरण गरिरहेको बताएकी छन्।

फाउण्डेसनका अध्यक्ष कट्टेलले एक करोड ५० लाख रुपैयाँको चेक महानगरले प्रदान गरेकोमा महानगर प्रमुख रेनु दाहाललाई धन्यवाद दिँदै निर्माण कार्यले थप गति लिने बताएका छन्। उनले अन्य रकमको बारेमा आवश्यक समन्वय र सहजीकरण गरिदिन समेत मेयर दाहाललाई आग्रह गरे ।

यसअघि असोज १३ गते भरतपुर महानगरले रंगशाला निर्माणका लागि धुर्मुस सुन्तली फाउण्डेसनलाई ५० लाख रुपैयाँ दिएको महानगरका प्रमुख प्रशासकीय अधिकृत प्रेमराज जोशीले जानकारी दिएका छन् । उनका अनुसार महानगरबाट पछिल्लो तीन हप्तामा फाउण्डेसनलाई दुई करोड रुपैयाँ निकासा भइसकेको छ ।

Loading...
राजमार्ग समाचारदाता
fnnews@gmail.com

यो छुट्टाउनु भो कि..