ताप्लेजुङ दोभान बजारका आगलागी विस्थापितलाई भूकम्प पीडितसरह सहयोग हुनुपर्छ : योगेश भट्टराई

फागुन १८, काठमाडौं । नेकपाका स्थायी समिति सदस्य, पूर्वमन्त्री तथा प्रेस सङ्गठन इञ्चार्ज योगेशकुमार भट्टराईले आगलागीबाट विस्थापित परिवारलाई दीर्घकालीन पुनःस्थापनाका लागि भूकम्पपीडितसरह सहयोग उपलब्ध गराउन माग गरेका छन्।

पूर्वमन्त्री भट्टराईले एक प्रेस विज्ञप्ति जारी गर्दै भनेका छन्, “बुधबार ताप्लेजुङको मेरिङदेन गाउँपालिका–३ दोभान बजारमा आगलागी भएको घटनाप्रति गहिरो दुःख व्यक्त गर्दछु ।” स्थानीय प्रशासनको प्रारम्भिक विवरणअनुसार आगलागीबाट ४७ वटा घर जलेर नष्ट भएका छन् भने ७९ परिवार विस्थापित भएका छन् । अधिकांश घरमा पसल रहेकाले पसलका सम्पूर्ण मालसमान जलेर नष्ट भएका छन् । घरमा मानिसको आवास पनि रहेकाले घरायसी सामान पनि पूरै क्षति भएको छ ।

आगलागी हुन साथ त्यसलाई नियन्त्रणमा लिन स्थानीय जनसमुदाय तथा सुरक्षाकर्मीले गरेको प्रयत्नका बाबजुत साँघुरो बजार, खुला ठाउँको अभाव तथा दमकललगायत साधन अभावका कारण ठूलो मात्रामा क्षति हुन पुगेको छ । आगलागीलाई नियन्त्रणमा लिन प्रयत्न गर्ने स्थानीय जनसमुदाय नेपाली सेना, नेपाल प्रहरी, सशस्त्र प्रहरी, जनप्रतिनिधि, कर्मचारी, दमकल चालक, स्वयंसेवकलगायत सबैमा भट्टराईले धन्यवाद व्यक्त गरेका छन् ।

भट्टराईले विज्ञप्तिमा भनेका छन्, “आगलागीका कारण आवासविहीन भएका स्थानीयलाई तत्काल राहत उपलब्ध गराउन र दीर्घकालीन पुनःस्थापनाका लागि भूकम्पपीडित सरह सहयोग उपलब्ध गराउन नेपाल सरकारसमक्ष माग गर्दछु ।” पीडितप्रति सहानुभूति प्रकट गर्दै आवश्यक राहत तथा पुनः स्थापनाका लागि आफ्नो तर्फबाट सक्दो पहल गर्ने भट्टराई प्रतिबद्धता समेत व्यक्त गरेका छन् ।

राजमार्ग
gharaaganmedia@gmail.com

यो छुट्टाउनु भो कि..