मर्न लागेका व्यक्तिले गरिदिए यस्तो काण्ड, आफू मरेर गए पूरै परिवार जेलमा

एजेन्सी। आफ्नो मृत्यु हुनुभन्दा अघि आफ्नो परिवारको सुरक्षित भविष्यका लागि केही गरेर मात्र मरौं भन्ने धेरैको चाहना हुन्छ । धेरैजसोले सकेसम्म परिवारको लागि राम्रो गर्छन् । केही गर्न नसकेमा त्यत्तिकै छोड्छन् तर आफू मरेपछि परिवारलाई समस्यामा पारेर भने कोही जान चाहँदैनन् । तर, एक व्यक्तिले भने आफू त मरेर गए पूरै परिवारलाई जेल जानुपर्ने अवस्था सृजना गरिदिएका छन् ।

यी व्यक्तिले आफू मरेर जाँदाजाँदा परिवारका लागि समस्याको यस्तो खाडल खनेर गए जसबाच बच्न असम्भवजस्तै देखिएको छ । यी मर्ने व्यक्ति एक बैंकका शाखा प्रबन्धक हुन् । ती बैंक प्रबन्धकले आफू केही दिन मात्र बाँच्ने भन्ने थाहा पाएपछि आफ्नो अन्तिम इच्छा पूरा गर्न खोज्दा यस्तो भएको हो । घटना भारतको उत्तर प्रदेशको गोण्डा जिल्लामा भएको भारतीय दैनिक अमर उजालाले लेखेको छ ।

समाचारमा जनाइएअनुसार सर्व युपी ग्रामीण बैंकको चंदवतपुर शाखामा प्रबन्धक रहेका रावेन्द्र प्रकाश श्रीवास्तवले आफू केही दिन मात्र बाँच्छु भन्ने थाहा पाएपछि बैंकको ९० लाख ४३ हजार रुपैयाँ घोटाला गरे । उनले यो रकम आफ्नी पत्नी, छोराछोरी र नातेदारको खातामा ट्रान्सफर गरिदिए ताकि आफ्नो मृत्युपछि कुनै किसिमको समस्या नपरोस् । तर, रावेन्द्रको मृत्युपछि यो पैसाले उनकी श्रीमती तथा छोराछोरीलाई  यो घोटालाले निकै ठूलो समस्या पारेको छ ।

रावेन्द्रको पूरै परिवारविरुद्ध रकम अपचलन, धोकाधडी लगायतका अभियोगमा मुद्दा दर्ता भएको छ । बैंकका नयाँ शाखा प्रबन्धक अभय प्रताप सिंहले प्रहरीमा उजुरी दिएका हुन् । उजुरीमा सिंहले ९ जून २०१७ देखि ३० जनवरी २०१८ सम्म बैंकको प्रबनधक रहँदा रावेन्द्रले यो घोटाला गरेको बताएका छन् । त्यतिबेला बिरामी भएर जाँच गर्दा डाक्टरले रावेन्द्रलाई उनी ६–७ महिना मात्र बाँच्ने बताएका थिए ।

लगत्तै रावेन्द्रले बैंकमा खाता भएका ३४ जनाको नाममा ऋण मन्जुर गरिदिए । उनले ती ३४ जनाको नाममा बैंकबाट ऋण लिएर सो रकम आफ्ना परिवार र आफन्तको खातामा जम्मा गरिदिए । यही पैसाबाट उनले लखनउमा एउटा फ्ल्याट किने । २०१८ को ३० जनवरीमा रावेन्द्रको मृत्यु भयो । त्यसपछि आएका शाखा प्रबन्धकलाई कारोबारमा शंका लागेपछि जाँच गर्दा रावेन्द्रको घोटाला खुलेको हो । अब रावेन्द्रको यो अवराधको सजाय उनको परिवारले भोग्नुपर्नेछ ।

राजमार्ग समाचारदाता
fnnews@gmail.com

यो छुट्टाउनु भो कि..